Wax-isbarida waxaa lagu qeexaa in aad noqoto macalinkaaga oo loola jeedo in aad sameyso dadaal shakhsi ah oo aad wax barato, adigoo ka kabaranaya buugaagta, joornaalada, internetka, ama adigoo adeegsanaaya casharro si aad u barto mowduuc gaar ah iyo koorso la diyaariyay. Sidoo kale wax-isbaridda macalin la’aan waa hab fiican oo aad ku baraneyso mowduucyada aad xiisaynayso laakiin aan lagu bixin goobaha waxbarashada.

Muhiimadda ay leedahay wax-isbaridda.

Wax-isbarida waa hab wax lagu barto si madax-bannaan iyada oo aan la helin tilmaamo rasmi ah. Waxay kaa caawin kartaa inaad horumariso xirfadahaaga iyo hab fikirkaaga. Sidoo kale waxaad wax baran kartaa goorta aad doonto iyo meesha kugu habboon ee aad rabto inaad wax ku barato, kaliya Waxaad u baahan tahay inaad si dhab ah uga fikirto waxyaabaha aad baranayso islamarkaana aad awoodo, taasoo kuu sahleysa inaad dhisto kalsoonidaada.

Faaidooyinka ay leedahay Wax-isbaridda

• Wax-isbariddu waxay kaa caawinaysaa inaad u diyaar garowdo suuqa shaqada iyadoo kuu sahlaysa inaad si madax-bannaan u barato xirfado cusub. Shaqo-bixiyeyaasha ayaa si gaar ah u qiimeeya dadka leh awoodda isbaridda iyo hal-abuurka shaqsiga ah.

• Waxaad wax u baran kartaa si madax-bannaan adigoo aan ku xirnayn jadwal ama manhaj rasmi ah, taasoo kuu oggolaanaysa inaad sahamiso danahaaga gaarka ah isla markaana aad horumariso hal-abuurkaaga.

• Maadaama aysan u baahnayn kharash badan, wax-isbariddu waxay ku siinaysaa fursad waxbarasho oo la awoodi karo, iyadoo isla mar ahaantaasna kuu dhisaysa adkaysi iyo dulqaad marka aad wajahdo caqabado.

Waxaa jira siyaabo badan oo kala duwan kuwaasoo loo adeegsado wax-isbaridda, hadii ay tahay barashada xirfadaha, luuqadaha, iyo arrimaha Teknoloojiyadda. Waxaa halkaan kugula wadaagayaa 10 Siyaabood oo aad wax isku bari karto Macalin la’aan.

1. Marka hore Deji Yoolalkaga

In aad dejiso yoolal cad cad waxay kaa caawin doontaa inaad gaarto hadafkaaga, waxaadna diiradda saaraysaa ujeedadaada wax-isbaridda.

2. Raadinta isha saxda ah.

Waxaa jira ilo badan oo kala duwan oo la heli karo, oo ay ku jiraan buugaag, maqaallo, mareegaha, iyo koorsooyinka internetka. Dooro agabka khuseeya danahaaga iyo qaabka waxbarasho.

3. Qorshe sameyn.

Qorshe waxbarasho qeexan oo habaysan waxey kaa caawineysaa inaad qeexdo, goorta iyo mowduuca aad wax ka baranayso, iyo sida aad u cabbiri karto horumarkaaga. Marka aad qorshe wax-isbarid macallin la’aan sameysato waxay awood kuu siinaysaa inaad dejiso oo aad raacdo yoolalkaaga waxbarasho, ka gudubto caqabadaha, oo aad ugu dambayn gaadho aqoonta iyo xirfadaha aad rabto.

4. Jadwal Sameeyn.

Jadwal si wanaagsan loo habeeyey ayaa muhiim u ah wax-isbaridda Macalin la’aan, waxay kaa caawin doontaa inaad ku socoto jid sax ah iyo inaad joogteyso qorshahaaga, si aad u gaadho yoolalkaaga waxbarasho.

5. Joogteynta

Wax-isbaridda joogtada ah ayaa ka waxtar badan marka loo eego midka aan joogtada aheyn. Sababtoo ah joogteynta ayaa fure u ah guusha wax-isbaridda macalin la’aan, sidoo kale wuxuu kaa caawinayaa inaad samaysato jadwal joogto ah, taasoo kuu sahlaysa inaad sii haysato macluumaadka oo aad ku dhisto aqoontaada wakhti badan.

6. Sameeynta Meel Waxbarasho Shakhsi ahaaneed

Dooro meel jawi degan oo leh iftiin ku filan halkaas oo la dhigi karo miis aad wax ku barato iyo kursi, islamarkaana aanan laheyn saxmad ama buuq kaa mashquuliya howlahaaga waxbarasho.

7. Diyaarinta Agabka waxbarasho

Hadii aad wax ka baraneyso internet-ka waxaa wanaagsan inaad isticmaasho computer ama tablet iyo internet hagaagsan, sidoo kale hadii aad buugaag wax ka baraneyso soo diyaarso kuwa jadwalka kugu jira, waxey kaa caawinaysaa inaad ku raaxeysato waxbarashadaada.

8. Nasiino helid

Qaadashada nasashada inta lagu jiro daraasadda waxay kordhisaa xoogga iyo wax soo saarka. Waxaad ku jadwalaysan kartaa wakhtigaaga waxbarasho 30 daqiiqo kasto inaad qaadato nasiino yar, halkii aad fadhiisan lahayd muddo dheer.

9. Markasta dulqaad samee

wax-isbaridda waxay noqon kartaa mid adag, horumarkuna wuxuu noqon karaa mid had iyo jeer toosan. Waxaa suuragal ah inaad la kulanto caqabado yar yar, sidaa darteed U samir oo ku adkayso dadaalkaaga.

10. Ka Go’naasho

waa qodob muhiim ah marka ay timaado wax-isbaridda waa aas-aaska guushaada, sabbatoo ah waxay kaalin mug leh ka ciyaartaa awoodaada inaad ku sii jirto dhiirigelinta, diiradda, iyo ugu dambeyntii ku guuleysiga raadinta aqoontaada iyo xirfadahaaga.

Ugu dambeyn, talooyinka kor ku xusan waa talooyinka ugu wanaagsan ee wax-isbaridda, si aad u horumariso awoodaada waxbarasho. Xusuusnow in wax-isbaridda ay tahay xirfad nolosha oo dhan ah, iyo awoodda aad naftaada u barato waxyaabo cusub waxay noqon kartaa mid faa’iido leh. Waxay kuu ogolaanaysaa inaad gacanta ku dhigto waxbarashadaada oo aad sahamiso mawduucyada sida dhabta ah kuu xiiseeya.

Home